iJunoon Archives

Ik Aarzu Hay Poori Parwardigaar Kare
Main Dair Se Jaon Woh Mera Intizaar Kare

Apne Hathon Se Sanware Zulfain Meri
Aur Is Tarah Se Muhabbat Ka Iqraar Kare

Lipat Jaye Woh Mujh Se Aalm E Madhoshi Main
Aur Josh-O-Junoon Main Muhabbat Ka Izhaar Kare

Ho Shab Wisaal Ki Aisi Woh Ya Rab
K Choom K Matha Woh Mujhe Baidaar Kare

Usey Chhor K Chahon Ju Main Jana Kabhi
Woh Rooke Mujhe Aur Ik Aur Raat Ka Israar Kare

Kasam Khuda Ki Main Kisi Aur Ka Ho Nahi Sakta
Yeh Wada E Wafa Woh Baar Baar Kare

Kabi Tum Apni Mohabbat Ka Aitbaar To Do
Mai Chahoon Toot K Tum Ko Ye Ikhtiyaar To Do

Guzarti Hi Nahi Mujh Se Ye Zindagi Tanha
Sahara Pyaar Ka Deker Isey Guzaar To Do

Mai Sochti Hoon Tumhare Bagair Kya Hoga?
Dil-o-Dimaagh Per Ek Bhoj Hai Utaar To Do

Mere Khayal Ki Raahon Ko KehKashaan Kar Do
K Roshni Se Meri Zindagi Sanwaar To Do


Umeed-e-Wafa Ghum-e-Hijar Ka Mudawa Hai
Mai Intizaar Karoon Magar Zabt-e-Intizaar To Do

Naa Inteshaar Ka Khatra Naa Inhedam Ka Hai
Yeh Marhala To Tabahi Ke Ekhtataam Ka Hai

Jo Khatam Ho Gaya Rishtaa Woh Dosti Kaa Thaa
Jo Bach Gaya Hai Taaluq, Woh Inteqaam Ka Hai

Har Aik Lamha Ajab Khauf Be Panahi Kaa
Hamare Ahad Mein Ye Rang Subh-oo-Shaam Kaa Hai

Bachaiyen Kis Tarah Balaaon Se Bastii Ko
Mohafizon Kaa Iraada Bhii Qatl e Aam Kaa Hai

Yeh Buzdili Hai Ke Hote Hain Phool Unke liye
Woh Jin Ke Haath Mein Khanjar Hamare Naam Ka Hai

Safar Hai Dasht Kaa Aur Raat Hogaii 'Alam'
Hamaare Saamne Ab Masla Qayaam Ka Hai

Dekh Raha Hai Dariya Bhi Hairani Se
Main Ne Kaise Paar Kiya Aasani Se

Nadi Kinare Pahron Baitha Rahta Hun
Kya Rishta Hai Mera Bahte Pani Se

Har Kamre Se Dhoop, Hawa Ki Yari Thi
Ghar Ka Naqsha Bigra Hai Manmani Se

Ab Jungle Men Chain Se Soya Karta Hun
Dar Lagta Tha Bachpan Men Weerani Se

Dil Pagal Hai Roz Pasheman Hota Hai
Phir Bhi Baaz Nahin Aata Nadani Se.

Qalam Par Qarz Hai Jaan Ka Ada To Ho Raha Ho Ga
Magar Gumnaam Goshay Mai Koi To Ro Raha Ho Ga

Koi Ho Ga Kisi Sachi Azziyyat K Nashay Mai Gum
Koi Jhooti Khushi Ko Be Irada Dho Raha Ho Ga

Kisi Ko Yaad Aaye Ja Rahi Hogi Gai Patt Jharh
Koi Taaza Ruton K Beej Dil Mai Bo Raha Ho Ga

Koi Ukta Raha Ho Ga Kisi Purr Shor Mehfil Say
Koi Jadoo Bhari Tanhaiyon Mai Kho Raha Ho Ga

Kaheen Pardais Mai Be-Khuwab Aankhain Jagti Hongi
Koi Ik Yaad Orhay Apnay Ghar Mai So Raha Ho Ga

Har Ik Pal Ki Khabar Rakhnay Ki Aisi Kya Zaroorat Hai
Bhari Dunya Hai Iss Mai Kuch Na Kuch To Ho Raha Ho Ga