Ye Jo Diwane Se Do Char Nazar Ate Hain

ye jo diwane se do char nazar ate hain
in mein kuch sahib-e-asrar nazar ate hain
teri mahfil ka bharam rakhte hain so jate hain
werna ye log to bedar nazar ate hain
dour tak koi sitara hai na koi jugnu
marg-e-ummid k asar nazar ate hain
mere daman mein shararon k siwa kuch bhi nahin
ap phulon k kharidar nazar ate hain
kal jise chu nahin sakti thi farishton ki nazar
aj wo raunaq-e-bazar nazar ate hain
hashr mein kaun gawahi meri dega Saghar
sab tumhare hi tarafdar nazar ate hain...!
Saghar Siddique