iJunoon Archives 2016

yeh jo raig-e-dasht-e-firaq hai yeh ruke agar
yeh ruke agar to nishaaN mile,
yeh nishaaN mile
k jo faslooN kii saleeb hai
yeh gaarii hui hai kahaaN kahaaN
mere asmaN se kidhar gayii tere iltefaat ki kehkashaaN

mire be_Khabar, mire be nishaaN
yeh ruke agar to pata chale
maiN thaa kis nagar tuu rahaa kahaaN
k zamaan o makaaN ki yeh wusataiN
tujhe dekhne ko taras gayein
voh mere nasiib ki baarisheN
kisi aur Chhat pe baras gayein

mere chaar suu hai ghubaar-e-jaaN,
voh fishaar-e-jaaN,
k Khabar nahiiN mere haath ko mire haath kii
mere Khwaab se tere baam tak
tare rehguzar ka to zikr kya
nahiiN zaufishaN tere naam tak
haiN dhuaaN dhuaaN mire ustKhwaaN
mere aansuuoN meN bhuje hue mire ustKhwaaN
mire naqsh gar mire naqsh-e-jaaN

isii raig-e-dasht-e-firaaq meN rahe muntazir
tere muntazir!!!
mere Khawab jin ke fishaar meN
rahi mere haal se beKhabar teri rehguzar
tare rehguzar ke jo naqsh haiN mire haath par
magar is balaa ki hai tiirgi
k Khabar nahiiN mere haath ko mere haath ki
voh jo chashm-e-shobadaa saaz thii, woh uThe agar
mere ustKhwaaN meN ho roushni
ussi ek lamha-e-diid meN teri rehguzar!!
meri teera jaaN meN chamak uThe
mere Khawab se tairay baam tak,
sabhii manazroN meN damak uThhe
usii ek pal meN ho jaavidaaN
meri arzoo k hai bekaraaN
meri zindagi k hai muKhtasar

yeh jo raig-e-dasht-e-firaq hai, yeh ruke agar
yeh ruke agar

Khwaab TuuT jaate haiN
bheeR meN zamaane kii, haath ChhuuT jaate haiN
dost darr lehje meN silwateN sii paRti haiN
ik zara si ranjish se
shak ki zard Tehni par phuul badgumani ke
is tarah se khilte haiN
zindagi se pyaare bhii
ajnabi se lagte haiN, ghair ban ke milte haiN
umr bhar ki chaahat ko aasra nahiiN milta
Khamushi ke waqfoN meN
baat TuuT jaati hai aur sira nahiiN milta!
maazrat ke lafzoN ko roushni nahiiN milti
lazzat-e-paziirai, phir kabhi nahiiN milti
phuul rang vaadoN ki manzileN sukaRti haiN
raah muRne lagti hai
berukhi ke gare se be dili ki mitti se
faasle ki eintoN se, iint juRne lagtii hai
khaak uRne lagtii hai
Khwaab TuuT jaate haiN
vehmoN ke saaye se, umr bhar ki mehnat ko
pal meN luuT jaate haiN
ik zara si ranjish se
saath ChhuuT haiN
bheeR meN zamane kii
haath ChhuuT jaate haiN
Khwaab TuuT jaate haiN

aisii hii sard shaam thii voh bhii
jab vo mehndi rachaaye haathoN meN
apnii aahaT ke Khauf se larzaaN
surKh aaNchal meN muuNh Chhupaaye hue
apne Khat mujh se lene aayii thii
us kii sehmii huii nigaahoN meN
kitnii Khaamosh iltijaayeN thiiN
us ke chehre kii zard rangat meN
kitnii majabourioN ke saaye the!
mere haathoN se Khat pakaRte hii
jaane kyaa soch kar achaanak voh,
meraa shaanaa pakaR ke royi thii
us ke yaaquut rang hoThoN ke
kap_kapaate hue kinaaroN par
sainkRoN ankahe fasaane the !
sard shaamoN meN der tak aksar
jab ye manzar dikhayi detaa hai
ek lamhaa hinayi haathoN se
mujh ko apnii taraf bulaataa hai
ham_nashiiN roothh kar na jaa mujh se!
aisii hii sard shaam thii vo bhii!

Aisee bhi mohabbat ki saza deti hai dunia
mar jaye tu jenay ki dua deti hai dunia

hum kon say momeen thay jo ilzam na sehtay
pather ko bhagwan bana deti hai dunia

ye zakham mohabbat ka hai dikhnana na kisi ko
La kar saray bazar saja deti hai dunia

Qismat per karo naz na itna bhi faqeero
haton ki lakeeron ko mita deti hai dunia

marnay kay liye majboor tu karti hai ye lekin
Jeenay kay tareeqay bhi sekha deti hai dunia