iJunoon Archives 2016

Ho dard or dard ka darmaan bhi na ho
to samnay rahay teri pehchan bhi na ho

maana k umer bhar tu mera ho nahin saka
aisa bhi kia k tu mera mehman bhi na ho

aaghaz is safar ka karain aao mil kay ham
jis main kahin bicharnay ka imkaan bhi na ho

ho jay jo bhi hona hai aisa na ho kabhi
is dil main tery milnay ka arman bhi na ho

han or qadam pay khoof hai yahan har qadam pay gham
dil kay nagar ka rasta sunsaan bhi na ho

har baar pochta hai kay akhir hai baat kia
hamdam kisi ka itna to anjaan bhi na ho

ye qufal dil kaleed e muhabbat say khol do
aisa na ho kay phir kahin Imran bhi na ho

Main hon majnoon mera andaz zamanay wala
teri nagri main to pathar nahi khanay wala

tu nay daikha hi nahi sath mery chal ky kabhi
main hon tanhai ka bhi sath nibhanay wala

mujh ko tum dasht e taheer main na choro tanha
khof taari hai ajab dil ko darane wala

khof ata hai mujhy apni hi tanhai sy
roth jata hai koi mujh ko mananay wala

dil wo sheesha k tera aks liye phirta hai
roz aata hai koi is ko mitanay wala

is ki har bat sir ankhon pr liye phirta hon
mujh ko accha bhi to lagta hai rulanay wala

is qadar ajnabi andaz sy kiun daikhta hai
main wohi hon tera kirdaar fasanay wala

har qadam soch samjh kr hi uthana ay dil!
tera rehbar to nahin rah batanay wala

chahay jitni bhi safarish karo is ki imran
main teri baton main hargiz nahin anay wala

Dhuup ke saath gayaa saath nibhaane wala
ab kahaan ayega vo lauT ke aane wala

ret par chhod gayaa naqsh hazaaron apne
kisii paagal kii tarah naqsh miTaane wala

sabz shaaKhen kabhii aise to nahiin cheeKhti hain
kaun aya hai parindon ko Darane wala

aariz-e-shaam kii surKhi ne kiyaa faash usay
pardaa-e-abr men thaa aag lagaane wala

safar-e-shab kaa taqaazaa hai mere saath raho
dasht purhoul hai tuufaan hai aane wala

mujh ko darr pardaa sunata rahaa qissaa apna
agale waqton kii hikayat sunaane wala

shabnami ghaas ghane phuul larazti kiranen
kaun aayaa hai Khazano ko luTaane wala

ab to aaraam karen sooghti aaNkhen merii
raat kaa aaKhirii taaraa bhii hai jaane wala

Kuch to ay yaar ilaaj-e-ghum-e-tanhaai ho
Baat itni bhi na baRh jaaye ke ruswaai ho

Doobne wale to ankhon se bhi kab nikle hain
Doobne k leay lazim nahen gehraai ho

Jis ne bhi mujh ko tamasha sa bana rakha hay
Ab zaroori hai wohi shakhs tamashaai ho

Main tujhe jeet bhi tohfe may nahi de sakta
Chaahata ye bhi nahi hoon tare paspai ho

Aaj to bazm may har aankh thi purnum jaise
Daastaan meri kisi ne yahaan dohrai ho

Koi anjaan na ho shehr-e-mohabbat ka makeen
Kaash har dil ki har ik dil se shanasaai ho

Yoon guzar jaata hay Imran teray kooche se
Tera waaqif na ho jaise koi saudai ho