iJunoon Archives 2016

ye dil ye paagal dil meraa kyon bujh gayaa aavaaragii
is dasht men ik shahar thaa vo kyaa huaa aavaaragii

kal shab mujhe be shakl sii aavaaz ne chauNka diyaa
main ne kahaa tuu kaun hai us ne kahaa aavaaragii

ik tuu ki sadiyon se mere ham raah bhi ham raaz bhi
ik main ki tere naam se naa aashnaa aavaaragii

ye dard kii tanhaaiyaaN ye dasht kaa viraN safar
ham log to uktaa gaye apanii sunaa aavaaragii

ik ajanabii jhonke ne jab puchha mere Gam kaa sabab
sehara kii bhigi ret par main ne likhaa aavaaragii

le ab to dasht-e-shab kii sari vusaten sone lagin
ab jagna hogaa hamen kab tak bataa aavaaragii

kal raat tanhaa chaaNd ko dekhaa thaa main ne Khvaab men
'Mohsin' mujhe raas aayegii shaayad sadaa aavaaragii

kuchh to main bhii bahut dil kaa kamzor huuN
kuchh muhabbat bhii hai fitaratan badgumaN

tazkara ko_ii ho zikr teraa rahaa
avval-e-aaKhir daramiyaaN daramiyaaN

jaane kis desh se dil men aa jaate hain
chaaNdanii raat men dard ke kaaravaaN

ko_ii kaaNTaa chubha nahiin hotaa
dil agar phuul saa nahiin hotaa

kuchh to majburiyaN rahii hongii
yuuN ko_ii bevafaa nahiin hotaa

guftaguu un se roz hotii hai
muddaton saamanaa nahiin hotaa

jii bahut chahata sach bolen
kyaa karen hausala nahiin hotaa

raat kaa intazaar kaun kare
aaj kal din men kyaa nahiin hotaa

Khushbuu kii tarah aayaa vo tez havaon men
maaNga thaa jise ham ne din raat duaaon men

tum chhat par nahiin aaye main ghar se nahiin niklaa
ye chaaNd bahut laTka savan ki ghaTaon men

is shahar men ik laDki bilkul hai Gazal jaisii
phuulon kii badan vaalii Khushbuu sii adaaon men

duniyaa kii tarah vo bhii haNste hain muhabbat par
Duube huye rahate the jo log vafaaon men

man mausam kaa kahaa, chhaai ghaTaa, jaam uThaa
aag se aag bujhaa, phuul khilaa, jaam uThaa

pee mere yaar tujhe apanii qasam detaa huuN
bhuul jaa shikwa o gila, haath milaa, jaam uThaa

haath men jaam jahaaN aayaa muqaddar chamka
sab badal jaayegaa qismat kaa likha jaam uThaa

ek pal bhii kabhii ho jaataa hai sadiyon jaisaa
der kyaa karanaa yahaaN, haath baDaa, jaam uThaa

pyaar hii pyaar hai sab log baraabar hain yahaaN
maikade men ko_ii chota na baDaa, jaam uThaa