Waqt ke sath anaasar bhi rahe sazish me

Waqt ke sath anaasar bhi rahe sazish me,
Jal gaye pair kabhi dhoop kabhi barish me,

Woh tou ik saada-o-kam shauq ka talib nikla,
Hum ne nahaq hi ganwaya usey aarayesh me,

Zindagi ki koi mehroomi nahin yaad ayi,
Jab talak hu mein tere qurb ki asayish me,

Aik dunya ka qaseeda tha agarche mere naam,
Lutf aata tha kisi shakhs ki fehmayesh me,

Us ki ankhen bhi meri tarah se girvi kahin aur,
Khawb ka qarz barh jata hai ik khawish me...!
Parveen Shakir